繼續同史友們介紹一啲有趣嘅歷史謎題，古代嘅宮廷畫師毛延壽嘅故事可能史友們讀書時就已經聽過，傅聞呢位畫師就因為冇收到賄賂而刻意將剛入宮嘅王昭君畫醜，等佢唔會畀漢元帝睇中。故事聽就聽咗好多年，但到底呢個又係咪事實呢？阿史今次就同大家講一講啦！
王昭君係西漢漢元帝時期嘅宮女，雖然關於「昭君出塞」嘅故事後來就有好多版本，但喺《漢書．匈奴傳》當中就冇太多詳細記載，只係提到王昭君係作為五個宮女之一一同出塞和親匈奴。至於《後漢書》當中就有細節提到王昭君之所以主動和親，係因為「不得見御，積悲怨，乃請掖庭令求行」，所以為咗證明皇帝冇眼光，就選擇自告奮勇去和親，某程度都係對漢元帝嘅一種諷刺。
而喺以上嘅史料當中，其實都係冇提及到毛延壽畫醜王昭君嘅故事，而呢個故事其實就係出自晉朝《西京雜記》當中，而呢個故事亦都冇直接講明係毛延壽畫醜王昭君，反而係漢元帝因為見到王昭君嘅長相而發覺走寶，於是下令調查，一怒之下先決定殺晒宮廷畫師。而當時毛延壽就係宮廷畫師之首，所以就食咗呢隻死貓喇！
原圖嚟自網絡